'Kalai Nilavu' RAVICHANDRAN

[vasudevan31355]

'வரப்பிரசாதம்' திரைப்படத்தில் வரும் சூப்பர் ஹிட் பாடல் "கங்கை நதியோரம் ராமன் நடந்தான்" ரவி, ஜெயசித்ரா நடிப்பில்...யேசுதாஸ் மற்றும் வாணி ஜெயராமன் இனிய குரல்களில்.



அன்புடன்,
வாசுதேவன்.

[mr_karthik]

அன்புள்ள வாசுதேவன் சார்,

தங்களின் பங்களிப்புகளை நடிகர்திலகத்தின் திரிக்கு அடுத்தபடியாக, ரவிச்சந்திரன் திரியில் பதிவிட்டு அசத்தி வருகிறீர்கள்.

ரவிச்சந்திரனின் அட்டகாசமான திரைப்பட ஸ்டில்கள் (கலர் மற்றும் கருப்பு வெள்ளை)

கலை நிலாவின் அசத்தலான வீடியோ பாடல் காட்சிகள்

Smart Hero-வின் திரைப்படங்கள் பற்றிய அபூர்வமான தகவல்கள்

என பல்வேறு வகையான பதிவுகளின்மூலம் அசத்தி வருகிறீர்கள். கதாநாயகனாக அவரது தமிழ்த்திரை பங்களிப்பு பற்றி இன்றைய இளம் தலைமுறையினர் அறியும் வண்ணம் செய்து வரும் தங்கள் சேவை சிறக்க வாழ்த்துக்கள்.

ஜெய்சங்கர் திரியிலும் தங்கள் மேலான பதிவுகளைத் தருவீர்கள் என்று நம்புகிறோம்.

[RAGHAVENDRA]

1967ம் ஆண்டில் வெளிவந்த பல மறக்க முடியாத தமிழ்த்திரைக்காவியங்களில் ஒன்று முக்தா ஸ்ரீநிவாசன்-சோ கூட்டணியில் வெளிவந்த நினைவில் நின்றவள். வி.குமார் இசையில் பாடல்கள் மிகப் பிரசித்தம். நந்தன் வந்தான் கோவிலிலே பாடல் சரளாவை உச்சத்திற்கு கொண்டு சென்றது என்றால் மிகையில்லை. என்ன தெரியும் இந்த சின்னப் பெண்ணுக்கு பாடலும் அதே போல் பிரபலமானது. இவற்றுக்கெல்லாம் சிகரம் வைத்த பாடல் தான் தொட்டதா தொடாததா பாடல். டி.எம்.எஸ். சுசீலா குரலில் சூப்பர் ஹிட்டான பாடலை இப்போது காண்போம்.

[mr_karthik]

அன்புள்ள ராகவேந்தர் சார்,

60-களில் முக்தா பிலிம்ஸ் படங்களில் வி.குமார் கொடிகட்டிப்பறந்தார். 'நினைவில் நின்றவள்', 'பொம்மலாட்டம்', 'நிறைகுடம்' படங்களில் பாடல்கள் அனைத்தும் சூப்பர்.

பாடல்களில் பாங்கோஸை சற்று தூக்கலாக இசைப்பது குமாரின் ஸ்பெஷாலிட்டி.

[vasudevan31355]

அன்பு கார்த்திக் சார்,

தங்கள் உற்சாகமான பாராட்டுக்களுக்கு என் உற்சாகமான நன்றிகள்.

கலை நிலவின் அத்தனை படங்களையும் இத்திரியில் அலசிவிட வேண்டும் என்ற எண்ணம் தங்களைப் போன்ற விரல் விட்டு எண்ணி விடக்கூடிய அருமையான ரசிகர்களின் அன்பினாலும், ஆதரவினாலும் எனக்கு ஏற்படுகிறது. இத்திரியை ரசிக வேந்தர், பம்மலார், தங்களைப் போன்ற அன்பு ரசிகர்களின் துணை இருப்பதால் எங்கோ கொண்டு சென்று விடலாம். ரவியின் படங்கள் நமக்கு பெரும் உற்சாகத்தை அளிக்கக்கூடியவை என்பது நிஜம்.

அது சுமாராய் இருந்தாலும் சரி. இரண்டு ஜாலிப் பாட்டு, இரண்டு டூயட், மூன்று நான்கு அனல் கக்கும் ஸ்டன்ட், கொஞ்சம் தாய், தங்கை செண்டிமெண்ட் என்ற மசாலாக் கலவை என்று அவர் படங்கள் நம்மை ஈர்த்துவிடும்.

மறுபடியும் தங்கள் உன்னத ரசனைக்கு என் உண்மையான நன்றிகள்.

அன்புடன்,
வாசுதேவன்.

[vasudevan31355]

'மாலதி' (1970) ஒரு சிறப்பு பிளாஷ்பேக்



நடிகர்கள்: ஜெமினி கணேசன், 'கலை நிலவு' ரவிச்சந்திரன், சரோஜாதேவி, வரலக்ஷ்மி, நாகேஷ், சுந்தரராஜன், 'தேங்காய்' சீனிவாசன்

படம் வெளி வந்த ஆண்டு: 29-10-1970

தயாரிப்பு:-சித்ரா புரொடக்ஷ்ன்ஸ்

பாடல்கள்:-"கவியரசு"கண்ணதாசன்

மூலக்கதை:-கோமதி சுப்ரமணியம்

இசை: "மெல்லிசைமன்னர்" எம்.எஸ்.விஸ்வநாதன்.

திரைக்கதை,வசனம், இயக்கம்: கே.எஸ்.கோபாலகிருஷ்ணன்.

'இயக்குநர் திலகம்' கே.எஸ்.கோபாலகிருஷ்ணன் அவர்கள் இயக்கத்தில் வெளி வந்த படம். காதல் மன்னனும், கலைநிலாவும் இணைந்து நடித்த குடும்பச் சித்திரம்.

'கதை:

ஜெமினியும் சரோஜாதேவியும் காதலர்கள். சந்தர்ப்பவசத்தால் சரோஜாதேவி ரவியைத் திருமணம் செய்ய நேரிடுகிறது. ரவி குடிகாரனாகவும்,பெண் பித்தனாகவும் அலைய சரோஜாதேவி பொறுமை காத்து பழைய காதலனையும் ஆறுதல்படுத்தி, தன் குடிகாரக் கணவரைத் திருத்த சபதமெடுத்து, அவனால் பற்பல இன்னல்களை அனுபவித்து இறுதியில் அவனைத் திருத்தி வெற்றிவாகை சூடுவதே கதை.

இயக்குனர் திலகத்தின் குடும்ப செண்டிமெண்ட் வசனங்கள் ஆழாமாயும், கருத்துள்ளதாகவும் இருந்தது.

ரவியும் குடிகாரனாகவும் பெண் பித்தனாகவும் நன்றாகச் செய்திருப்பார். தான் செய்பவை தவறுகள் என மனைவி உணர்த்தியபின் உணர்ந்து மீண்டும் பழக்க வழக்கங்களில் இருந்து விடுபடமுடியாமல் தவிப்பதும், தன் தவறுகளைத் திருத்திக் கொள்ள முடியாமல் மனைவியிடம் புலம்புவதும் ரவிக்கு நடிக்க சந்தர்ப்பம் வாய்த்த இடங்கள். அதை அவரும் நன்றாகப் புரிந்து பயன்படுத்திக் கொண்டிருப்பார். ஜெமினி ஆரம்ப கால சரோஜாதேவியின் காதலனாக வந்து காதல் லீலைகளில் ஈடுபடுவது வழக்கம் போல. 'சிவந்தமண்' மேஜிக் ராதிகாவும் உண்டு. இவரும் K.S.G.யின் நிறையப் படங்களில் நடித்துள்ளார். (சின்னஞ்சிறு உலகம்' படத்தில் கே. ஆர் விஜயாவுக்கு அடுத்தபடியான ஹீரோயினாக வருவார். புதுமைப் பெண்களடி... பூமிக்குக் கண்களடி...என்ற பாடல் கூட அவருக்கு கோஷ்டியுடன் உண்டு).

ஹீரோயின் சப்ஜெக்ட் என்பதால் அபிநயசரஸ்வதிக்கு படம் நெடுக சுமைதாங்கியாய் வேலை. சற்று வயது முதிர்ந்த இரண்டாவது ரவுண்ட் வந்த சரோஜாதேவியை இதில் காணலாம். எனவே டூயட் சீன்கள் கொஞ்சம் நெருடல். இருந்தாலும் இந்தக் கால ஹீரோயின்களை விட நன்றாகவே சோபிப்பார். (இந்தக் கால இளசுகளின் சுடிதாரை அப்போதே அணிந்து அசத்தியிருப்பார்) தேங்காய் ரவியின் நண்பனாக வந்து சகல பழக்கங்களையும் ரவிக்கு கற்றுத் தருகிறார். அவருக்கு அது ச்சும்மா..என்பது போல.

K.S.G.யின் ஆஸ்தான நடிகை வரலக்ஷ்மி இல்லாமலா?... நாகேஷ் கிச்சு கிச்சு மூட்டுகிறார். மேஜரும் தன் பங்குக்கு குறை வைக்கவில்லை.

பாடல்கள்:

"கற்பனையோ கைவந்ததோ" என்ற பி.சுசீலாவுடன் இணைந்து இளம் S.P.B. யின் குழையும் காந்தக் குரலில் ஒலிக்கும் எத்தனை ஜென்மம் எடுத்தாலும் மறக்க முடியாத பாடல்

"சிடு சிடு சிடு சிடுவென...என்ற S.P.B., பி.சுசீலாவின் குரல்களில் ஒலிக்கும் உற்சாகப் பாடல்.

"எங்கே என் கிண்ணங்கள்" என்ற T.M.S இன் ஜாலி பாடல் (ராதிகா...தேவிகா...ஓடிவா... என்று வரிசையாக பெண்களின் பெயரை உச்சரிப்பது அழகு. இந்த டைப் பாடல்கள் ரவிக்கு எவ்வளவு பொருத்தமாய் இருக்கின்றன!)





















அன்புடன்,
வாசுதேவன்.

[vasudevan31355]

'மாலதி' நிழற்படங்கள் தொடர்கின்றன.




















அன்புடன்,
வாசுதேவன்.

[vasudevan31355]

'மாலதி' வீடியோ பாடல்கள்

"கற்பனையோ கைவந்ததோ" சூப்பர் ஹிட் பாடல் வீடியோ வடிவில்



"சிட் சிட் சிட் எங்கே போவோம்" தூள் பாடல் வீடியோ வடிவில்




அன்புடன்,
வாசுதேவன்.

[saradhaa_sn]

டியர் பம்மலார்,

பேசும்படம் இதழில் வந்த ரவியின் சிறப்பு வண்ணப்படம், இதயக்கமலம் விளம்பர ஆவணம் மற்றும் இதயக்கமலம் விமர்சனப்பதிவு அனைத்தும் மிகவும் சிறப்பாக உள்ளது. காணக்கிடைக்காத இத்தகைய பொக்கிஷங்களை இங்கே பதிப்பித்து மகிழ்ச்சியில் ஆழ்த்தியமைக்கு மிக்க நன்றி.

தங்களின் இதுபோன்ற தொடர் பங்களிப்பை எதிர்பார்க்கிறோம்.

[saradhaa_sn]

டியர் வாசுதேவன்,

கலை நிலவு ரவிச்சந்திரன் அவர்களின் திரியில் தங்களின் சமீபத்திய பங்களிப்புகளைப் பாராட்ட வார்த்தைகளே இல்லை. சமீப காலம் வரை சற்று தொய்வடைந்த நிலையில் காணப்பட்ட இத்திரி தற்போது தங்களின் மேலான அக்கறையினால் ஜெட் வேகமெடுத்துள்ளது. அதற்காக ஏராளமான நன்றிகள்.

இத்திரியில் தங்களது சமீபத்திய பதிவகளனைத்தையும் கண்டு மலைத்துப்போய்விட்டேன். எவ்வளவு வீடியோ இணைப்புக்கள், எவ்வளவு அரிய புகைப்படங்கள். ஒவ்வொரு படத்துக்கும் குறிப்புக்கள் என அச்த்துகிறீர்கள்.

தனித்தனி பாடல்களின் வீடியோக்கள் மட்டுமின்றி, ஒவ்வொரு படத்துக்குமான வீடியோக்களும் புகைப்படங்களும் மிகவும் நன்றாக இருக்கின்றன. மதராஸ் டு பாண்டிச்சேரியில் துவங்கி, நாலும் தெரிந்தவன், கௌரி கல்யாணம், மாலதி என்று படங்களைப்பற்றி அலசுவதில் அசுர வேகத்தில் சென்றுகொண்டிருக்கிறீர்கள். (நாலும் தெரிந்தவனில் ரவியும் காஞ்சனாவும் இணைந்திருக்கும் புகைப்படம் கருப்பு வெள்ளையிலும் கூட என்ன தெளிவு, என்ன அழகு). நீங்கள் சொல்லியிருப்பதுபோல, ரவியின் படங்கள் எப்போதும் பொழுதுபோக்கு அம்சங்களைப் பொறுத்தவரை பார்ப்போரை ஏமாற்றாமல் அமைந்திருக்கும்.

இன்னும் பல்வேறு படங்களையும் கவர் பண்ன இருப்பதான உங்கள் அறிவிப்பு மகிழ்ச்சியளிக்கிறது. ஜமாயுங்கள்.

தங்கள் சிரத்தையான உழைப்புக்கு பாராட்டுக்கள், நன்றிகள்.